ભાષણ

શ્રીનાથજીના મંદિર પાસે સાવ સુકલકડું છોકરું કેડમાં ઘાલી
એક દસ બાર વર્ષની છોકરી ભીખ માંગતી હતી
છોકરું ડીહાઈડ્રેટ થઇ ગયું છે એમ વિચારી મારી દિકરીએ
પાસેની લારીમાંથી ચાર મોસંબી લઇ એને આપી

અમારા દેખતાં જ એ મોસંબીઓ લારીવાળાને પાછી આપી
એની પાસેથી એણે રોકડા પૈસા કરાવી લીધા
દિકરીના કહેવાથી મેં લારીવાળાને ટકોર કરી
"સાહેબ, એ છોકરી રોકડા પૈસા એના માલિકને નહીં લાવી આપે તો
સાંજે એની સખત પીટાઈ થઇ જશે" લારીવાળાએ પોતાનો બચાવ કર્યો

"આવા બાળકોને નિર્દય ગુંડાઓના હાથમાંથી છોડાવવાનું કામજ સાચો ધર્મ છે"
અમારી ટોળકીમાં મેં ભાષણ આપ્યું
મારી દિકરી ગુજરાતીમાં કરેલું મારું ભાષણ સમજી પણ ન શકી

ચાર દિવસ પછી ડોલર કમાવા અમેરિકા આવતો રહ્યો
ભરત શાહ