નથી હું ફક્ત ઈંટ ને ચૂનાની ઈમારત
છું ઈતિહાસ, મૂડી અણમોલ અમાનત

ઉભી છું અડીખમ તળે ખુદાની હિફાઝત
કરતી હર મજહબમાં સદીથી ઈબાદત

આવ્યા અહીં કૈઈ કેટલાય સેવાની દાનત
ગયા થૈ શરણ માટીપગું, ખુરશીની તાકત

હો શાશન ગોરું, કે દેશી સાહેબની રિયાસત
રહી મારી વફા ગોધરાને વિના કો' બગાવત

નાચી છું આનંદે નિહાળી સહુને સલામત
મળતા ગળે એકમેકને વિના કો' અદાવત

રડી છું નિહાળી નગરને ખૂણે એક દાવત
ને બીજે, ભૂખ્યા બાળકની લાચાર હાલત

બદલાયો સમય, બદલવાની છે આદત
મતભેદ પુરાણાની કરવાની છે શહાદત  
-ભરત શાહ